У Магілёве прыхільнікі футбола змогуць паглядзець фінал чэмпіянату свету на велізарным святлодыёдным экране. Фестываль балельшчыкаў ФІФА ў абласным цэнтры ўпершыню арганізуе аддзел спорту і турызму Магілёўскага гарвыканкама сумесна з кампаніямі «Шоу-майстар» і Fiesta led.

Так, 15 ліпеня (нядзеля) на тэрыторыі парка атракцыёнаў разгорнецца фан-зона. Тут аматары футбола змогуць не толькі паглядзець заключны матч мундыялю, але і паўдзельнічаць у спартыўных забаўках. Прадугледжана таксама шоу-праграма, праца фудкортаў і інш.

Фан-зона адкрыецца ў 16.00. У 18.00 пачнецца трансляцыя матчу, а пасля таго як пераможца ЧС будзе вызначаны, выступіць кавер-група Museon band. Мерапрыемства плануюць завяршыць феерверкам. Уваход у фан-зону свабодны.

Акрамя таго, анлайн-трансляцыя фіналу чэмпіянату свету па футболе адбудзецца на вялікім экране кінатэатра «Кастрычнік». Усім, хто жадае трапіць на мерапрыемства, неабходна набыць білет. Папярэдні продаж білетаў ужо пачаты.