Помнікі ахвярам Халакосту адкрыюць 29 ліпеня ў Быхаве, паведаміла прэс-сакратар Саюза беларускіх яўрэйскіх грамадскіх аб'яднанняў і абшчын Вікторыя Дземідзюк.

У цырымоніях возьмуць удзел прадстаўнікі Быхаўскага райвыканкама, фонду імя Саймана Лазаруса з Вялікабрытаніі і Злучаных Штатаў Амерыкі, кіраўнікі Саюза беларускіх яўрэйскіх грамадскіх аб'яднанняў і абшчын, грамадскасць. У ліку запрошаных таксама значацца прадстаўнікі дыпламатычнага корпуса.

У Быхаве на яўрэйскіх могілках адкрыюцца два помнікі.

Усяго з 2004 года ў Беларусі пры падтрымцы фонду імя Саймана Лазаруса ўстаноўлена 106 помнікаў ахвярам Халакосту. Пры Саюзе беларускіх яўрэйскіх грамадскіх аб'яднанняў і абшчын дзейнічае мемарыяльная камісія, якая сумесна з рэлігійнымі і іншымі арганізацыямі ажыццяўляе гэты праект.

«Мемарыяльныя знакі ўтрымліваюць яўрэйскую сімволіку і нагадваюць пра тое, што тут пахаваны людзі, забітыя па нацыянальнай прыкмеце», – адзначыла Вікторыя Дземідзюк.

Саюз беларускіх яўрэйскіх грамадскіх аб'яднанняў і абшчын заснаваны ў красавіку 1991 года. Яго асноўныя мэты – адраджэнне і кансалідацыя нацыянальнай і культурнай супольнасці яўрэяў у Беларусі, дабрачынная дзейнасць.

Па матэрыяле БЕЛТА