Сістэму звароту электронных рэцэптаў выкарыстоўвае 41 арганізацыя аховы здароўя Магілёўскай вобласці, яшчэ 15 знаходзяцца ў стадыі падключэння. Пра гэта паведамілі ў галоўным упраўленні па ахове здароўя аблвыканкама.

«Укараненне электроннага рэцэпта дазваляе мінімізаваць час на яго афармленне, выключыць падробку, дубляванне, пазбегнуць памылак, узмацніць кантроль набыцця лекавых сродкаў і аптымізаваць выдаткі на аплату льготных рэцэптаў», – адзначылі суразмоўцы.

Паводле іх слоў, для ўдасканалення сістэмы аховы здароўя, рашэнні праблем арганізацыі і кіравання ў рэгіёне рэалізуюць і іншыя мерапрыемствы па інфарматызацыі галіны. Паспяхова выкарыстоўваюцца такія сэрвісы, як электронныя накіраванні на розныя даследаванні, камп’ютарныя запіс на прыём да ўрача і выклік на дом, электронныя чэргі ў паліклініках.

У Беларусі створана адзіная рэспубліканская сістэма тэлемедыцынскага кансультавання, якая дазваляе ўрачам Магілёўскай вобласці ў складаных выпадках атрымаць парады ад вядучых спецыялістаў. Сучаснае дыягнастычнае абсталяванне (рэнтгенаграфічнае, тамаграфічнае, лабараторнае, кардыяграфічнае і інш.) мае выхад інфармацыі ў лічбавым фармаце. Такім чынам, вынікі дыягнастычных даследаванняў пры неабходнасці аператыўна перадаюцца ў іншую арганізацыю аховы здароўя для вывучэння рознымі ўрачамі.

«У перспектыве плануецца стварыць адзіную інтэрнэт-сістэму, з дапамогай якой пацыент праз асабісты кабінет зможа атрымаць доступ да сваёй медыцынскай інфармацыі, ажыццяўляць узаемадзеянне урачом, які яго лечыць», – падкрэслілі ў галоўным упраўленні па ахове здароўя.

Медыцынскую дапамогу насельніцтву Магілёўскай вобласці аказваюць у 63 бальнічных і 168 амбулаторна-паліклінічных арганізацыях, 21 станцыях хуткай медыцынскай дапамогі, 93 амбулаторыях урача агульнай практыкі.