На калегіі Камітэта дзяржаўнага кантролю Магілёўскай вобласці разгледжаны вынікі аўдыту эфектыўнасці работы СЭЗ «Магілёў». Пра гэта паведаміў першы намеснік старшыні камітэта Юрый Фралоў.

Быў адзначаны істотны ўплыў СЭЗ на эканоміку рэгіёна. У 2015-2017 гадах доля рэзідэнтаў свабоднай эканамічнай зоны ў асноўных макраэканамічных паказчыках сацыяльна-эканамічнага развіцця Прыдняпроўскага краю складала 15-52%.

Разам з тым, паводле ацэнкі, СЭЗ «Магілёў» функцыянуе недастаткова эфектыўна. «Актывізацыі працэсаў арганізацыі на яе тэрыторыі высокатэхналагічных, інавацыйных, прарыўных вытворчасцяў не назіраецца. Да таго ж у апошнія гады намеціўся шэраг негатыўных тэндэнцый: стратная праца асобных рэзідэнтаў, зніжэнне ўзроўню ўкладзеных інвестыцый і адгружанай інавацыйнай прадукцыі», - падкрэсліў Юрый Фралоў.

Таксама адзначана невыкананне рэзідэнтамі СЭЗ у поўным аб'ёме прадугледжаных заканадаўствам крытэрыяў эфектыўнасці іх дзейнасці, зніжэнне колькасці рэзідэнтаў СЭЗ, недастатковы ўзровень заработнай платы ў асобных з іх, парушэнні рэзідэнтамі СЭЗ заканадаўства аб знешнеэканамічнай дзейнасці, непрыняцце належных мер па ахове навакольнага асяроддзя.

Па выніках пасяджэння калегіі Магілёўскаму аблвыканкаму, адміністрацыі СЭЗ «Магілёў» і іншым зацікаўленым унесены прапановы для прыняцця мер рэагавання. Іх рэалізацыя ўзята на кантроль.