Усе раёны Магілёўскай вобласці прыступілі да ўборкі збожжавых і зернебабовых культур. Пра гэта карэспандэнту сайта паведамілі ў камітэце па сельскай гаспадарцы і харчаванні аблвыканкама.

Па стане на сённяшнюю раніцу ў рэгіёне ўбрана 26,5 тыс. га плошчаў (8,2%), намалочана больш за 77, 4 тыс. т збожжа. Сярэдняя ўраджайнасць складае 29,2 ц/га.

Па агульным намалоце лідзіруюць Кіраўскі (больш за 12,7 тыс. т) і Шклоўскі (10 тыс. т) раёны. Па ўраджайнасці наперадзе Шклоўскі раён – 48,2 ц/га, на другім месцы Горацкі – 38,5 ц/га, на трэцім Круглянскі – 35,3 ц/га.

Сярод гаспадарак па ўраджайнасці ў тройцы найлепшых сельгаспрадпрыемства Шклоўскага раёна: ААТ «Александрыйскае» – 59,1 ц/га, ААТ «Амкадор – Шклоў» – 55,4 ц/га і СП «Газавік – Сіпакова» – 54,4 ц/га.

На Магілёўшчыне таксама актыўна ідзе ўборка рапсу. Аграрыі рэгіёна ўжо скасілі і абмалацілі гэтую культуру з 88,9% плошчаў. З работамі цалкам справіліся 10 раёнаў з дваццаці аднаго. Завяршаюць у Хоцімскім (97%), Горацкім (91%) і Мсціслаўскім (89%) раёнах. У цэлым, практычна ўсе рэгіёны перасягнулі 80% рубеж па ўборцы азімага рапсу.

Усяго ў Магілёўскай вобласці скошана і абмалочана больш за 34,6 тыс. га плошчаў азімага рапсу. Пры гэтым намалочана звыш 44,5 тыс. т збожжа гэтай культуры. Сярэдняя ўраджайнасць складае 12,8 ц/га.