Чэмпіянат Беларусі па аўтаслаламе стартуе 18 жніўня ў Магілёве, паведаміў арганізатар спаборніцтваў Анатоль Шаўчэнка.

Спаборніцтвы па хуткасным манеўраванні – складовая частка рэспубліканскай акцыі «Спартсмены за бяспеку дарожнага руху», у якой удзельнічаюць найлепшыя прадстаўнікі аўтаспорту. Акцыя пройдзе ў 16-ы раз пры падтрымцы УДАІ МУС. У гэтым годзе фармат чэмпіянату змяніўся: да 7 гарадоў пашырылася геаграфія яго правядзення, а два этапы будуць арганізаваны ў адной вобласці два дні запар.

«Адкрыццё чэмпіянату адбудзецца ў Магілёве 18 жніўня. Гледачы змогуць не толькі атрымаць асалоду ад майстэрства спартсменаў, але і пратэставаць новыя аўтамабілі, сфатаграфавацца ў аварыйна-выратавальнай машыне і рэтрааўто, атрымаць прызы ад супрацоўнікаў ДАІ. 25 жніўня спартсмены зробяць прыпынак у Полацку, а ўжо на наступны дзень адправяцца ў Віцебск, дзе іх чакае самая доўгая і хуткасная траса. Далей чэмпіянат пройдзе ў Гродне, Гомелі, Баранавічах і фінішуе ў сталіцы. Спаборніцтвы будуць арганізаваны ў абсалютным, аматарскім і камандным заліках», – сказаў Анатоль Шаўчэнка. Шчыльны графік правядзення этапаў стане як для спартсменаў, так і аматараў чарговым выпрабаваннем волі і майстэрства.

Чэмпіянат па аўтаслаламе не толькі ўключае спартыўна-відовішчны складнік, але і нясе сацыяльную нагрузку. «Мы вучым аўтааматараў ваджэнню ў складаных пагодных умовах, наглядна паказваючы розніцу паводзін цвярозага і п’янага пешахода, даводзім карысную інфармацыю да бацькоў перад пачаткам навучальнага года», – адзначыў Анатоль Шаўчэнка.

Удзельнікі ахвотна дзеляцца сваім майстэрствам з гледачамі. «Прыцягненне ўвагі да аўтаспорту, які з’яўляецца выдатнай школай кіроўчага майстэрства, дае вынікі. Цяпер у свядомасці многіх аўтааматараў ёсць устойлівае меркаванне, што бяспека на дарозе залежыць не толькі ад спраўнага аўтамабіля. Акрамя таго, спаборніцтвы па хуткасным манеўраванні выклікаюць вялікую цікавасць у моладзі, якая не стала абмяжоўвацца адной дысцыплінай, а пайшла далей, паспрабаваўшы сябе і ў іншых відах аўтаспорту», – падкрэсліў ён.

Фінальныя заезды чэмпіянату па аўтаслаламе ў Мінску плануецца правесці 30 верасня, але будзе ўлічвацца надвор’е. Калі апошняя нядзеля верасня будзе дажджлівай, то спаборніцтвы перанясуць на 7 кастрычніка.

БЕЛТА