Фотапраект «Дэмбельскі альбом» адкрыецца 27 жніўня ў выставачнай зале музея этнаграфіі Магілёва (вул. Першамайская, 8). Пра гэта карэспандэнту сайта паведамілі ва ўстанове культуры.

Паводле слоў суразмоўцаў, на выставе будуць прадстаўлены здымкі і калажы з дэмбельскіх альбомаў 1960-х – 1980-х гадоў членаў трох творчых калектываў – НФК «Мінск» (Мінск), народнай «Студыі 3plus» (Магілёў), НФК «Вясёлка» (Магілёў). Таксама ў экспазіцыю ўвойдуць альбомы магілёўцаў, якія праходзілі тэрміновую службу ў розных рэгіёнах Савецкага Саюза і ў краінах сацыялістычнага лагера, плакаты з фондаў Магілёўскага абласнога краязнаўчага музея імя Еўдакіма Раманава.

«Мода на такія альбомы з’явілася ў СССР яшчэ ў 1960-я гады, – адзначылі суразмоўцы. – Традыцыя нарадзілася ў салдацкай масе як адказ на адноснае пазбаўленне асобы радавога вайскоўца. Да таго ж, натуральным было жаданне пакінуць памяць аб гэтым жыцці, прычым часам рамантычна і з гераізацыяй».

Спецыялісты падкрэслілі, што альбомы каштоўныя не толькі для асабістай і сямейнай гісторыі, але і для ваеннай таксама, паколькі з’яўляюцца матэрыяльнымі сведчаннямі той эпохі. Яны расказваюць і аб развіцці аматарскай чорна-белай фатаграфіі.

Выстава будзе працаваць да 25 верасня.