Указ №357 «Аб пустых і старых дамах» паскорыць рэалізацыю мерапрыемстваў па навядзенні ўзорнага парадку на зямлі і добраўпарадкаванні населеных пунктаў. Такое меркаванне выказаў старшыня Магілёўскага абласнога Савета дэпутатаў Дзмітрый Харытончык, каментуючы ўказ.

Праца па скарачэнні колькасці безгаспадарных і аварыйных пабудоў у населеных пунктах Магілёўскай вобласці вядзецца не адзін год, у гэтым кірунку зроблена нямала. «Але да пытанняў канфіскацыі ўласнасці, у якім бы стане яна ні знаходзілася, мы падыходзім вельмі ўзважана, каб не парушыць законнае права ўласнасці чалавека», – адзначыў Дзмітрый Харытончык. З іншага боку, па яго думку, мець занадта зарэгуляваныя і складаныя адміністрацыйныя працэдуры – сур’ёзны стрымлівальны механізм у рабоце па навядзенні парадку на зямлі і добраўпарадкаванні населеных пунктаў.

«Новы ўказ здымае цэлы шэраг бар’ераў у гэтай працы, дазваляе яе ўдасканаліць. Так, выканкамам прадастаўляецца права адчужаць пустыя і старыя дамы як на аўкцыёнах (у тым ліку з выкарыстаннем механізму паніжэння пачатковай цаны на 20%, 50% і 80 %), так і шляхам іх прамога продажу пры наяўнасці адной прапановы аб куплі. Гэта дазволіць паскорыць працэдуру адчужэння гэтых дамоў, а таксама паскорыць развіццё саміх населеных пунктаў, прыцягнуць у іх больш інвестараў», – сказаў старшыня абласнога Савета дэпутатаў.

У Магілёўскай вобласці за студзень-ліпень знесена ў сельскай мясцовасці 433 дамы, уцягнута ў гаспадарчы абарот 84 га зямлі. Гэтая колькасць не такая і вялікая, але за кожным аб’ектам – цэлая гісторыя і дастаткова сур’ёзная праца. Указ закліканы актывізаваць і спрасціць гэты працэс, распаўсюдзіць яго на гарады. Бо і тут нямала аб’ектаў, у якіх няма ўласнікаў, якія псуюць эстэтычнае аблічча населенага пункта, а часам і ўяўляюць непасрэдную пагрозу для мясцовых жыхароў. Указ дазволіць спрасціць прыняцце рашэнняў па іх продажы або перадачы новаму ўласніку, а калі будынак непрыдатны да эксплуатацыі і не падлягае рамонту – да яго зносу.

Ва ўказе прадугледжваецца магчымасць прадастаўлення выканкамам зямельнага ўчастка, на якім размешчаны пусты альбо стары дом, новаму землекарыстальніку пры ўмове зносу такога дома за яго кошт, што будзе спрыяць скарачэнню выдаткаў мясцовых органаў улады. Акрамя таго, падрабязна рэгламентуюцца механізмы працы з рухомай маёмасцю, размешчанай у пустых і старых дамах, а таксама парадак адчужэння і наступнай дзяржаўнай рэгістрацыі пустых і старых дамоў, у дачыненні да якіх адсутнічаюць правапацвярджальныя дакументы.

У дакуменце замацавана адказнасць для ўласніка пустуючага дома. Падаваемая ў мясцовы выканаўчы і распарадчы орган заява аб намеры выкарыстаць гэты дом павінна змяшчаць абавязацельствы выконваць устаноўленыя заканадаўствам мерапрыемствы па ахове і выкарыстанні зямель.

У найбліжэйшы час у вобласці плануецца правесці семінар па дадзенай тэматыцы, падзяліцца практычным вопытам раёнаў і намеціць стратэгію далейшых дзеянняў ужо з улікам новаўвядзенняў, прапісаных ва ўказе.

БЕЛТА