У горадзе на Дняпры 1-3 лістапада адбудзецца XXXXII адкрыты традыцыйны рэспубліканскі турнір па вольнай барацьбе памяці ганаровага грамадзяніна Магілёва, Героя Савецкага Саюза Мікалая Каралёва.

Удзел у мерапрыемстве, якое пройдзе на базе Дома спорту, прыме больш за 100 спартсменаў ва ўзросце да 20 гадоў. Як паведаміў карэспандэнту сайта галоўны суддзя спаборніцтваў Уладзімір Мялькоў, свой удзел у спаборніцтвах пацвердзілі барцы з усіх абласцей краіны і горада Мінска. Пакуль пад пытаннем застаецца прыезд на турнір украінскіх і расійскіх спартсменаў.

Хлопцы і дзяўчаты будуць спаборнічаць у дзесяці вагавых катэгорыях. Па выніках турніру пераможцы атрымаюць кубкі, медалі, дыпломы і каштоўныя прызы.

1 лістапада адбудзецца жараб’ёўка. Урачыстае адкрыццё спаборніцтваў запланавана на 2 лістапада (12.00). Узважванне спартсменаў будзе праходзіць штодня ў 8.30. Пачатак спаборніцтваў – у 10.30.

Мікалай Піліпавіч Каралёў – ваенны і партыйны дзеяч, генерал-маёр, Герой Савецкага Саюза, ганаровы грамадзянін Магілёва. Адзін з арганізатараў і кіраўнікоў партызанскага падполля і партызанскага руху ў Магілёўскай вобласці ў гады Вялікай Айчыннай вайны. У горадзе на Дняпры яго імем названая вуліца. На доме, дзе ён жыў (Першамайская, 67), усталявана мемарыяльная дошка. У сярэдняй школе №33 створаны музей М. П. Каралёва.