Музейныя работнікі дапамогуць юным магілёўцам стварыць навагоднія цацкі сваімі рукам. У Музеі этнаграфіі напярэдадні Новага года вырашылі арганізаваць спецыяльныя майстар-класы для школьнікаў усіх узростаў.

У канцы XIX стагоддзя было прынята ўпрыгожваць ёлкі чырвонымі і зялёнымі яблыкамі, пазалочанымі арэхамі, цукеркамі, пернікамі, садавіной, што нагадвалі пра дары валхвоў, расказалі ва ўстанове культуры. Першыя фабрычныя ёлачныя цацкі сталі завозіцца ў Расею з Германіі, але яны былі вельмі дарагімі і таму не ўсім даступнымі. У пачатку XX стагоддзя зялёных прыгажунь прыбіралі, выкарыстоўваючы цацкі з ваты, папяровыя гірлянды, фігуркі з пап’е-машэ. У асноўным іх рабілі дома. Выраблялі з простых, даступных матэрыялаў – ваты, фольгі, паперы, клею, ствараючы дзіўныя фігуркі анёлаў, клоўнаў, жывёл. У даваенны і пасляваенны перыяды вырабляліся цацкі з савецкай сімволікай, сцяжкі. Да 1960-м гадоў у вытворчасці ёлачнай прадукцыі асноўную нішу занялі фабрычныя цацкі са шкла. У 1970-я гады з’явілася мода ўпрыгожваць гераіню свята багата і разнастайна, часам цалкам завешваючы яе дажджом, так што ўпрыгожвання станавілася практычна не відаць.

Сёння самаробныя ёлачныя цацкі выйшлі з моды. Але захоўваецца памяць аб іх, у тым ліку ў этнаграфічным музеі. Тут на тэрыторыі экспазіцыі на працягу трох дзён (13, 17 і 20 снежня) з 15.00 да 17.00 школьнікам прапануюць акунуцца ў свет творчасці і прынесці дадому па-сапраўднаму чароўную навагоднюю цацку, сагрэтую цяплом рук і душы. Уваходны кошт білета – Br1.

Папярэдні запіс на майстар-класы абавязковы. Кантактны тэлефон: (80222) 25-13-81, 22-01-92. Адрас музея этнаграфіі: г. Магілёў, вул. Першамайская, 8.