Урачыстая цырымонія запальвання агнёў на галоўнай ёлцы Магілёва пройдзе 22 снежня на плошчы Леніна. Гэта паслужыць стартам навагодніх мерапрыемстваў у абласным цэнтры, паведамілі ў гарвыканкаме.

Перад пачаткам галоўнага дзейства каля абласнога дыягнастычнага цэнтра адбудзецца танцавальны флэшмоб з удзелам гараджан і галоўных навагодніх персанажаў – Дзядоў Марозаў і Снягурак. Яго фіналам стане запуск у неба святлівых шароў з навагоднімі віншаваннямі.

Затым на сімвалічным троне Дзед Мароз і Снягурка ў суправаджэнні світы з казачных герояў і пад музыку духавога аркестра пройдуць па вуліцы Першамайскай да галоўнай ёлкі. На плошчы Леніна вясёлая казачная кампанія зробіць круг пашаны, павіншуе ўсіх з надыходзячымі святамі і запаліць агні на зялёнай прыгажуні з удзелам кіраўніцтва горада.

Працягне вечар мюзікл па рускай народнай казцы «Марозка» і навагодні баль. Гасцей яшчэ чакае святочны канцэрт з удзелам магілёўскіх кавер-гуртоў і артыстаў, а таксама дыскатэка.

У Магілёве напярэдадні калядных і навагодніх святаў плануецца правесці больш за сто мерапрыемстваў.

БЕЛТА