Камітэт дзяржкантролю Магілёўскай вобласці правёў маніторынг якасці кармоў, якія нарыхтоўваюцца ў сельскагаспадарчых арганізацыях рэгіёна. Пра гэта паведаміў першы намеснік старшыні камітэта Юрый Фралоў.

Вынікі праверак паказалі, што нарыхтоўка кармоў у цэлым праведзена на высокім арганізацыйным узроўні. Аграрыямі вобласці на зімова-стойлавы перыяд нарыхтавана 1112,1 тыс. т кармавых адзінак травяных кармоў (97% да задання) або 28,1 ц на ўмоўную галаву жывёлы (на 1,8 ц больш за адпаведны паказчык мінулага года).

Разам з тым у перыяд правядзення названых работ выяўляліся хібы і недахопы, якія негатыўным чынам уплываюць на якасць кармоў. У іх ліку варта назваць наступныя: кашэнне траў пазней за аптымальныя тэрміны, перавышэнне тэрмінаў закладкі сіласна-сянажных траншэй, неналежная герметызацыя сховішчаў, невыкананне патрабаванняў па вільготнасці і тэмпературы закладваемай масы, па выкарыстанні кансервантаў.

Праз невыкананне тэхналогіі нарыхтоўкі амаль палова сена і сенажу па выніках лабараторных даследаванняў аднесена да 2 класа, яшчэ 25% – да 3-га.

Асобнымі сельгасвытворцамі не забяспечана належнае захоўванне кармоў. Праз недахоп сенажна-сіласных траншэй, недастатковае ўкараненне сучасных тэхналогій нарыхтоўкі кармоў (у палімерную ўпакоўку), у цэлым па вобласці больш за 250 тыс. т сенажу і сіласу (7% ад нарыхтаванага) закладзена на захоўванне ў заглыбленыя траншэі і бурты, што можа пацягнуць звышнарматыўнае іх псаванне, памяншэнне пажыўнай каштоўнасці і дадатковы расход у зімова-стойлавы перыяд утрымання жывёлы.

Па выніках праведзенага маніторынгу мясцовым органам улады і сельгасарганізацыям у аператыўным парадку ўнесены прапановы па ліквідацыі выяўленых недаглядаў і недахопаў, прыцягненні вінаватых асоб да адказнасці.

Выкананне прапаноў узята на кантроль.