У сувязі з правядзеннем навагодняга тэатралізаванага шэсця «Чароўныя імгненні Новага года» 25 снежня ў Магілёве часткова перакрыюць вуліцы ў цэнтры горада. Пра гэта карэспандэнту сайта паведамілі ў гарвыканкаме.

Так, з 11.45 да заканчэння шэсця рух транспартных сродкаў па вуліцы Першамайскай (ад плошчы Славы да вуліцы Міронава), вуліцы Міронава (ад вуліцы Першамайскай да вуліцы Піянерскай), бульвары Леніна будзе цалкам забаронены. У гэты час гарадскі грамадскі транспарт будзе рухацца ў аб’езд перакрытага ўчастка па вуліцы Піянерскай. Тралейбусы №2 і №4 пойдуць па скарочаных маршрутах да прыпыначных пунктаў «Плошча Арджанікідзэ» і «Чыгуначны вакзал». Таксама будзе арганізаваны рух двух аўтобусаў па маршруце № 32к «Гарадская ветэрынарная станцыя – Плошча Леніна».

Акрамя таго, да 8.00 упраўленне дзяржаўнай аўтамабільнай інспекцыі ўпраўлення ўнутраных спраў Магілёўскага абласнога выканаўчага камітэта даручана вызваліць ад аўтатранспарту праезджыя часткі плошчы Славы, вуліцы Першамайскай (ад плошчы Славы да вуліцы Міронава) і вуліцы Міронава (ад вуліцы Першамайскай да вуліцы Піянерскай), бульвара Леніна. З 8.00 да 14.00 таксама абмяжуюць стаянку аўтамабільнага транспарту па вуліцы Першамайскай (ад плошчы Славы да вуліцы Міронава), вуліцы Міронава (ад вуліцы Першамайскай да вуліцы Піянерскай), бульвары Леніна, на пляцоўцы каля ўстановы культуры «Магілёўскі абласны мастацкі музей імя П. В. Масленікава».