Магілёўскі гарвыканкам абвясціў штогадовы конкурс на самае лепшае навагодняе і каляднае афармленне горада. У спаборніцтве запрашаюць прыняць удзел арганізацыі і грамадзян, якія з’яўляюцца ўладальнікамі аднакватэрных жылых дамоў, размешчаных на тэрыторыі абласнога цэнтра.

Пры падвядзенні вынікаў конкурсу будзе ўлічвацца комплекснае мастацкае рашэнне афармлення фасадаў будынкаў, уваходных груп, дзвярэй, вокнаў, вітрын, рэкламных шыльдаў, існуючага азелянення і малых архітэктурных формаў, прылеглых тэрыторый. Таксама журы прыме пад увагу выкарыстанне нестандартных тэхнічных рашэнняў, колькасць і якасць сучасных светлавых і дэкаратыўных элементаў, надзіманых і анімацыйных фігур на навагоднюю і калядную тэматыку, арганізацыю месцаў зімовага адпачынку.

Пераможцаў конкурсу вызначаць у 12 групах: сярод арганізацый транспарту, сувязі; прамысловых арганізацый; арганізацый гандлю і паслуг; ЖКГ; устаноў культуры і адукацыі ў сферы культуры; аховы здароўя; адукацыі (асобна дашкольнай, агульнай сярэдняй дадатковай); фізічнай культуры, спорту, турызму; уласнікаў жылых дамоў, размешчаных на тэрыторыі Кастрычніцкага і Ленінскага раёнаў горада.

Конкурс пройдзе ў два этапы. Падчас першага – з 20 снежня па 29 снежня – арганізацыі і ўладальнікі жылых дамоў накіроўваюць заяўкі для ўдзелу на адрас галіновых камісій. Апошнія, у сваю чаргу, вывучаюць вынік праведзенай канкурсантамі працы і вызначаюць прэтэндэнтаў на прызавыя месцы ў адпаведных групах. Падчас другога этапу (з 4 студзеня па 14 студзеня 2019 года) спецыяльная камісія падводзіць вынікі, прысуджае прэміі і ўручае дыпломы пераможцам.

Заахвочванне пераможцаў гарадскога конкурсу ажыццяўляецца за кошт сродкаў бюджэту горада. Прызавы фонд складае ад 10 да 40 базавых велічынь. Гэтыя грашовыя сродкі накіроўваюцца на ўмацаванне матэрыяльна-тэхнічнай базы.

ПАЛАЖЭННЕ аб правядзенні штогадовага гарадскога конкурсу на самае лепшае навагодняе і каляднае афармленне горада Магілёва

ЗАЯЎКА для юрыдычных асоб

ЗАЯЎКА для ўласнікаў жылых дамоў