Праваахоўнікі падчас рэйду ў мінулую пятніцу і выхадныя выявілі шматлікія парушэнні захоўвання і рэалізацыі піратэхнічных вырабаў, паведамілі ва УУС Магілёўскага аблвыканкама.

Пры праверцы гандлёвага аб’екта па вуліцы Каштанавай канфіскаваны 3134 адзінкі піратэхнічных вырабаў на агульную суму Вг277,5. У асноўным феерверкі і петарды. Таварна-транспартных накладных, сертыфікатаў і іншых дакументаў на тавар у індывідуальнага прадпрымальніка не было. За парушэнне правілаў захоўвання піратэхнічных вырабаў яму пагражае адміністрацыйная адказнасць па ч. 1 арт. 23. 48 КаАП у выглядзе штрафу да 10 базавых велічынь (адна БВ роўная Br24,5).

Яшчэ адзін прадпрымальнік па вуліцы Ленінскай захоўваў з парушэннем дзеючага заканадаўства 16 піратэхнічных вырабаў на Вг2022. Вельмі небяспечныя ў выкарыстанні салютныя батарэі, якія змяшчаюць па 100 і больш стрэлаў кожная, захоўваліся без элементарнай металічнай шафы. Прычым для індывідуальнага прадпрымальніка такое правапарушэнне з’яўляецца паўторным на працягу года пасля накладання адміністрацыйнага спагнання. Яму пагражае адказнасць па ч. 2 арт. 23.48 КаАП у выглядзе штрафу ў памеры ад 10 да 20 базавых велічынь з канфіскацыяй прадмета правапарушэння або без канфіскацыі.

Таксама супрацоўнікамі АБЭЗ Ленінскага і Кастрычніцкага РАУС Магілёва ў сувязі з парушэннем правілаў захоўвання канфіскоўваліся розныя піратэхнічныя вырабы ў гандляроў на міні-рынку «Грабянёўскі» і ў гандлёвых аб’ектах па праспекце Пушкінскім і вуліцы Габраўскай. Усяго канфіскавана больш за 6 тыс. адзінак піратэхнічных вырабаў. Па ўсіх фактах праводзяцца праверкі. Рэйдавыя мерапрыемствы, у тым ліку з удзелам прадстаўнікоў падатковай інспекцыі і МНС, працягваюцца.

БЕЛТА