Ганаровае Консульства Латвійскай Рэспублікі па Магілёве і Магілёўскай вобласці адкрылі ў горадзе на Дняпры. Ва ўрачыстай цырымоніі прынялі ўдзел саветнік – намеснік пасла Латвіі ў Беларусі Даце Рутка, кіраўнік Дырэкцыі па эканамічных адносінах, гандлі і развіцці Міністэрства замежных спраў Латвіі Юрыс Шталмейстарс, старшыня Магілёўскага аблвыканкама Уладзімір Даманеўскі, старшыня Магілёўскага гарвыканкама Уладзімір Цумараў, перадае карэспандэнт сайта.

Асноўнай задачай консульства будзе ўмацаванне міжнародных адносін у розных сферах дзейнасці – эканамічнай, палітычнай, прававой, ідэалагічнай, дыпламатычнай, культурнай і турыстычнай, ажыццяўленне кантактаў з мясцовымі ўладамі, абслугоўванне, абарона правоў і інтарэсаў грамадзян, рашэнне іх праблем у межах заканадаўства, афармленне дакументаў.

«Адкрыццё ганаровага консульства Латвійскай Рэспублікі ў Магілёве – важная падзея, і мы спадзяёмся, што яно ўнясе асаблівы ўклад у далейшае развіццё нашых узаемаадносін, – адзначыў Уладзімір Даманеўскі. – Латвія для Беларусі з’яўляецца важным эканамічным партнёрам і транзітным калідорам для прасоўвання прадукцыі нашых вытворцаў у трэція краіны».

Паводле слоў губернатара, за апошні час міжрэгіянальнае супрацоўніцтва з Латвіяй актыўна развіваецца, дынамічна расце знешнегандлёвы тавараабарот. За студзень-кастрычнік ён склаў $40,7 млн. і павялічыўся ў параўнанні з аналагічным перыядам мінулага года больш чым на 36%. Аснову нашых паставак у прыбалтыйскую дзяржаву складаюць аміна- і фенолаальдэгідныя смолы і поліўрэтаны, лесаматэрыялы, цэмент, вырабы з яго, металаканструкцыі. У Магілёўскую вобласць завозяцца прадукты для падрыхтоўкі соусаў, змешаныя прыправы, лекавыя сродкі, драўнянастружкавыя пліты. Акрамя таго, Латвія ўваходзіць у лік краін, якія актыўна інвестуюць у эканоміку Прыдняпроўскага краю. У рэгіёне паспяхова працуюць прадпрыемствы з латвійскім капіталам, якія паказваюць добрыя вынікі.

Уладзімір Даманеўскі выказаў упэўненасць, што адкрыццё Ганаровага консульства надасць новы імпульс развіццю супрацоўніцтва, запэўніў ва ўсебаковай падтрымцы і садзейнічанні мясцовай выканаўчай улады.

Юрыс Шталмейстарс падкрэсліў: Латвія з’яўляецца надзейным партнёрам Беларусі ў сферы транспарту і лагістыкі, шмат беларускіх тавараў адпраўляецца ў Еўропу праз латвійскія Парты. «Больш за 3% жыхароў Латвіі – гэта беларусы. Мы любім вашу краіну і цэнім нашу дружбу», – адзначыў ён.

Латвія зараз дынамічна развіваецца: гэта адна з самых перспектыўных у Еўрасаюзе дзяржаў, падкрэсліў Юрыс Шталмейстарс. «Мы з аптымізмам глядзім на праекты, якія ўжо рэалізуюцца ў Беларусі, і праекты, што знаходзяцца ў стадыі прапрацоўкі. У ліку перспектыўных новых вектараў узаемавыгаднага супрацоўніцтва – інавацыйныя тэхналогіі, а кантакты павінны развівацца не толькі паміж прадпрыемствамі, чыноўнікамі, але і жыхарамі дзвюх краін. Адкрыццё Ганаровага консульства ў Магілёве будзе садзейнічаць узмацненню ўжо наяўнага партнёрства», – упэўнены прадстаўнік Міністэрства замежных спраў Латвіі.

У сваю чаргу Дацэ Рутка паведаміла, што па ўсім свеце працуе 189 ганаровых і 13 генеральных консулаў Латвіі. У той жа час ганаровае консульства прыбалтыйскай дзяржавы ў Магілёве – першае ў Беларусі, таму з яго адкрыццём ускладаюцца вялікія надзеі на ўзмацненне выніковасці дыялогу дзвюх краін. Тым больш што яно супала з важнай падзеяй – у Латвіі адзначаюць 100-годдзе незалежнасці.

Ганаровым консулам Латвійскай Рэспублікі па Магілёве і Магілёўскай вобласці прызначаны Аляксей Саўчук. Дацэ Рутка ўручыла дыпламату кансулярны патэнт – афіцыйны дакумент, які пацвярджае яго статус. Бізнесмен з’яўляецца сузаснавальнікам некалькіх вытворцаў малочных прадуктаў – Горацкага харчовага камбіната (брэнд Exponenta), ТАА «Акдимол», СТАА «Белсыр», ААТ «Малочныя горкі» і інш. Акрамя таго, ён узначальвае Беларускую федэрацыю панкратыёна і баявых мастацтваў.

Аляксей Саўчук мае намер працягваць і пашыраць ужо існае супрацоўніцтва ў галіне эканомікі. Акцэнт будзе зроблены на развіцці вытворчасці харчовай прадукцыі, а таксама ўзаемаадносін у сферы навукі і адукацыі. У планах – у першай палове 2019 года арганізаваць у горадзе на Дняпры форум з удзелам вядучых бізнесменаў Латвіі і Магілёўскай вобласці.

Асаблівая ўвага будзе нададзена развіццю міжрэгіянальнага партнёрства. «Хоць Латвія і Беларусь – суседзі, але ў бізнесменаў пакуль вельмі павярхоўныя веды аб існуючых сістэмах падаткаабкладання, вядучых сферах у эканоміцы, – заўважыў Аляксей Саўчук. – Таму важна арганізаваць асабістую прысутнасць людзей, якія хочуць і гатовыя ўкладваць грошы ў развіццё абедзвюх краін, каб яны на свае вочы ўбачылі існуючы патэнцыял і, зыходзячы з гэтага, выбудоўвалі далейшую стратэгію супрацоўніцтва».

Ганаровы консул паднёс рэгіёну першы падарунак на новай пасадзе – сертыфікат на 1 тыс. кг цукерак ад Кіраўскага харчовага камбіната для навагодніх падарункаў дзіцячым дашкольным і школьным установам Магілёўскай вобласці.

Ганаровае Консульства Латвійскай Рэспублікі ў Магілёве размясцілася па адрасе: вуліца Ленінская, 7а. З 17 снежня 2018 года па буднях у першай палове дня прыём будзе весці памочнік ганаровага консула.