Еўрапейскі банк рэканструкцыі і развіцця купляе долю ў беларускім аграхолдынгу «Сервалюкс», паведамілі ў банку.

«ЕБРР укладзе 10 млн еўра ў набыццё мінарытарнага пакета акцый «Сервалюкс» – прыватнага вертыкальна інтэграванага беларускага аграхолдынга, які працуе ў некалькіх сектарах, уключаючы вытворчасць мяса птушкі, мясных і малочных прадуктаў, корму для жывёлы, а таксама раздробны гандаль прадуктамі харчавання», – гаворыцца ў паведамленні ЕБРР.

Гэтыя сродкі будуць накіраваны на будаўніцтва новага цэха перапрацоўкі мяса ў Смалявічах агульнай вытворчай магутнасцю 70 т мяса за суткі. Прадпрыемства таксама пабудуе трыгенерацыйную ўстаноўку магутнасцю 6,58 МВт, якая будзе забяспечваць цэх перапрацоўкі электраэнергіяй і цяплом і скароціць штогадовыя выкіды CO2 на 6 200 т.

ЕБРР – Міжнародны банк, спрыяе развіццю прыватнага сектара і прадпрымальніцкай ініцыятывы. Беларусь з’яўляецца членам Еўрапейскага банка рэканструкцыі і развіцця з 1992 года. З пачатку сваёй дзейнасці ў Беларусі ЕБРР інвеставаў больш за 2 млрд еўра ў праекты ў розных сектарах эканомікі краіны.

БЕЛТА