Пачалася рэканструкцыя Бабруйскай гарадской дзіцячай бальніцы. Пра гэта паведамілі на тэматычнай прэс-канферэнцыі ў гарвыканкаме. 

Падчас рамонту пераплануюць палаты, заменяць унутраныя інжынерныя сеткі, электраправодку, вентыляцыю, аконныя і дзвярныя праёмы. Ад старога будынка застануцца толькі падмурак і сцены. Аднак і апошнія ўцепляць, узмоцняць металаканструкцыямі.

Займацца рэканструкцыяй будуць спецыялісты ГУКДП «Міжраённы домабудаўнічы камбінат». Агульны кошт праекта – больш за Br10,8 млн. На закупку абсталявання плануецца выдаткаваць парадку Br1,3 млн., у тым ліку на медыцынскае – Br565 тыс.

Па нарматыўным тэрміне аб’ект павінны здаць у эксплуатацыю праз 2 гады. Прычым 3-павярховы будынак, дзе размесціцца лячэбны корпус, маюць намер адкрыць ужо да канца 2019 года. А рэканструкцыя двухпавярховага корпуса, у якім у асноўным будуць размяшчацца адміністрацыя бальніцы і харчаблок, працягнецца.

Усе пацыенты дзіцячай бальніцы ўжо пераехалі на новыя месцы лячэння. Аддзяленне рэанімацыі на 6 ложкаў, аддзяленне дзяцей да 3 гадоў і аддзяленне дзяцей ад 3 да 18 гадоў з агульнай саматычнай паталогіяй размешчаны ў трохпавярховым гінекалагічным корпусе радзільнага дома. Аддзяленне дзяцей ад 3 да 18 гадоў з інфекцыйнай паталогіяй цяпер размяшчаецца ў інфекцыйным корпусе Бабруйскай цэнтральнай бальніцы.

Нагадаем: будынак Бабруйскай гарадской дзіцячай бальніцы ўзведзены ў 1963 годзе. Установа аховы здароўя была разлічана на 150 ложкаў. Такую ж колькасць запланавана пакінуць і пасля рэканструкцыі. У 2009 годзе ўжо рэканструявалі самае складанае і дарагое рэанімацыйнае аддзяленне. Яго выязная брыгада цяпер абслугоўвае пяць прылеглых раёнаў Магілёўскай вобласці.

Па матэрыялах bobrlife.by