Удзельнікі міжкантынентальнага веламарафона «Beibitshilik jane birlik. Peace and unity», прысвечанага Дню адзінства народа Казахстана і Году моладзі, 27 мая наведаюць Бабруйск. Для гасцей арганізуюць экскурсію па горадзе.  

Велапрабег стартаваў у Лондане 30 красавіка. У планах у шасцярых яго ўдзельнікаў – пераадолець 5 830 км, перасячы тэрыторыі сямі краін і больш за 50 гарадоў. У іх ліку Брэст, Бяроза, Мір, Мінск, Бабруйск, Гомель. Са славутасцямі беларускіх гарадоў казахі азнаёмяцца 23-29 мая.

Веласіпедысты будуць начаваць у палатках, гатаваць ежу ў даступных умовах і штодня дзяліцца фота- і відэасправаздачамі свайго падарожжа. Велапрабег таксама будзе транслявацца ў рэжыме анлайн на старонках КазГеа ў сацыяльных сетках. Завершыцца падарожжа ў Нур-Султане ў Дзень сталіцы.

Мэтай велапрабегу з’яўляецца папулярызацыя і прасоўванне Казахстана, развіццё турызму і масавага спорту, прапаганда здаровага ладу жыцця, культурнае і патрыятычнае выхаванне маладога пакалення.

Велапрабег арганізаваны грамадскім аб’яднаннем «Казахскае геаграфічнае таварыства» і Асамблеяй народа Казахстана пры падтрымцы пасольства Казахстана ў Вялікабрытаніі.