Свята сярэднявечнай культуры «Рыцарскі фэст – 2019» пройдзе 2-4 жніўня ў Мсціславе, паведамілі ў райвыканкаме.

Чакаецца, што ў гэтым годзе на мерапрыемства збяруцца гістарычныя клубы Беларусі, Расіі і Украіны. Гасцей чакаюць традыцыйныя рыцарскія турніры і забавы, спаборніцтвы лучнікаў, масавыя бітвы, конныя прадстаўленні і паказальныя выступленні, майстар-класы па сярэднявечных танцах, розныя вогненныя і светлавыя шоу, выступленні музычных этна- і фолк-груп.

Арганізатары распрацоўваюць новыя захапляльныя тэматычныя квэсты для дзяцей і дарослых. Адной з разынак стане конкурс сярэднявечных напояў, у якім змогуць прыняць удзел усе ахвотныя. Канкурсанты павінны будуць прадставіць напоі, вырабленыя па старадаўніх рэцэптах: віно, збітні, розную травяную гарбату. Госці таксама змогуць наведаць выставу «Гульні каралёў», дзе прадстаўлена гісторыя ваеннай справы эпохі Сярэднявечча, і здзейсніць займальную экскурсію ў кармеліцкі касцёл з наведваннем яго таямнічых вежаў і сутарэнняў.

Музычны калектыў, у складзе якога супрацоўнікі і выхаванцы мясцовай школы мастацтваў, прадставіць пастаноўкі ў сярэднявечным стылі, правядзе майстар-класы па старадаўніх танцах і выкананню песень. Свой удзел у форуме ўжо пацвердзілі гурты сярэднявечнай музыкі «Стары Ольса», «Літы талер» і FRAM (Украіна).

Арганізатарам фэсту выступаюць Мсціслаўскі райвыканкам і Цэнтралізаваная клубная сістэма Мсціслаўскага раёна.

БЕЛТА