Адкрыццё пляцоўкі «Яўрэйскі дворык» адбудзецца 4 жніўня на скрыжаванні вуліц Чангарскай і Бахарава ў Бабруйску. У мерапрыемстве прымуць удзел жыхары горада на Бярэзіне, шматлікія госці з Беларусі і замежжа.

Як заўважыў рабін Бабруйска Шаўль Хабабо, старадаўні будынак старой сінагогі заўсёды хацелі зрабіць славутасцю горада. «На пляцоўцы будуць месцы для адпачынку, на вокнах – дэкарацыі. Чалавек, які ідзе па вуліцы, зможа ўбачыць на вітражах маленне людзей у сінагозе, як жанчыны запальваюць свечкі, іншыя карцінкі мінулага. Мы хацелі зрабіць такую пляцоўку, каб ва ўраджэнцаў Бабруйска было жаданне сюды вярнуцца, дакрануцца да гісторыі роднага горада», – расказаў ён.

Фінансаванне праекта ажыццяўлялася за кошт яўрэйскай рэлігійнай абшчыны, а таксама ахвяраванняў, якія паступалі ад гараджан і яе сяброў з-за мяжы.

Па матэрыяле газеты “Бобруйскае жыццё”