Беларусь на Miss International-2019 прадставіць Марыя Первій. На нацыянальным конкурсе прыгажосці «Міс Беларусь-2018» дзяўчына заваявала тытул «Міс глядацкіх сімпатый» і ўвайшла ў ТОП-10, паведамілі ў прэс-службе Нацыянальнай школы прыгажосці.

Марыя родам з Бабруйска, з’яўляецца ўладальніцай 2-га месца на конкурсе «Міс Бабруйск-2016». Дзяўчына не толькі вучыцца ў Горацкай сельскагаспадарчай акадэміі, але і імкнецца развіць свой бізнес у сферы пракату аўтамабіляў, які задумала яшчэ ў дзяцінстве. Акрамя таго, яна мадэль з вопытам працы на подыумах за мяжой.

Беларуска пераканана, што прыгажосць – гэта набор агульначалавечых каштоўнасцей, і хоча натхняць маладое пакаленне сваім прыкладам. Марыя – дачка праваслаўнага святара, яна ўнесла лепту ў будаўніцтва храма і разам з сям’ёй пастаянна дапамагае маламаёмасным і бяздомным. На конкурсе «Міс Беларусь-2018» дзяўчына пасябравала з Марыяй Васілевіч, усяляк падбадзёрвала падчас удзелу ў «Міс Міру», арганізавала флэшмоб у яе падтрымку.

Miss International – міжнародны конкурс прыгажосці, які ўваходзіць у пяцёрку самых буйных і прэстыжных. На ім ацэньваецца не толькі знешні выгляд удзельніц, але і жаданне вырашыць глабальныя і лакальныя праблемы на планеце. Штогод у спаборніцтве прымае ўдзел каля 70 дзяржаў.

Сёлета конкурс адбудзецца 12 лістапада ў Токіа. Падрыхтоўка да яго ўжо пачалася. Марыі Первій трэба прайсці ўрокі ў Нацыянальнай школе прыгажосці па макіяжы, цырульніцкім мастацтве, фотапазіраванні, псіхалогіі, стылі і іншых дысцыплінах. Цяпер беларуская каманда ў пошуках дызайнераў і брэндаў, якія гатовы прадаставіць конкурсныя ўборы. А гэта пяць вячэрніх сукенак ў падлогу, тры кактэйльныя, дызайнерскі нацыянальны касцюм, купальны касцюм, вячэрняя сукенка для фінальнага шоу. У якасці падарункаў іншым удзельніцам і арганізатарам конкурсу Марыя адвязе зефір – любімыя прысмакі з малой Радзімы, горада Бабруйска. Падтрымлівае зямлячку ААТ «Чырвоны харчавік».

Букмекеры, якія прагназуюць вынікі конкурсу прыгажосці, ставяць беларускую ўдзельніцу ў ТОП-5.

Тэкст – БЕЛТА

Фота - Нацыянальная школа прыгажосці