Эка-арт фестываль «Астравы Дулебы» пройдзе ў гарадскім парку Клічава 31 жніўня. Пра гэта паведамілі ў Магілёўскім абласным метадычным цэнтры народнай творчасці і культурна-асветнай працы.

Фестываль аб’яднае выставы, экскурсіі, музычную праграму, спартыўныя спаборніцтвы, дасць магчымасць убачыць і пакаштаваць экапрадукты. На працягу дня тут будуць працаваць фотазоны, алея рамёстваў, інтэрактыўныя пляцоўкі ў фармаце астравоў: «Астравы Дулебы», «Фауна Беларусі», «Энергарэсурсы», «Беларускія прысмакі», «Традыцыйныя народныя танцы і гульні», «Партызанская завалінка», «Шляхта», «Спартыўная», «Горад дзяцінства», «Рыцары», «Вёска». Запланавана правядзенне некалькіх конкурсаў: па стварэнні фігур з балотнай сыравіны «Духі балот» і вырабаў з пластыка «Падары другое жыццё – захавай прыроду нашу».

«Эка-арт фестываль «Астравы Дулебы» – гэта экалагічнае свята, мэта якога – пазнаёміць удзельнікаў і гасцей з прыродай Клічаўскага раёна і рэспубліканскім гідралагічным заказнікам «Астравы Дулебы», прыцягнуць увагу да праблем захавання навакольнага асяроддзя, клімату, павышэння экалагічнай культуры насельніцтва», – адзначылі суразмоўцы. Таму да ўдзелу ў фестывалі запрашаюцца моладзевыя, грамадскія арганізацыі, навуковыя супольнасці, эколагі, калектывы прадпрыемстваў і арганізацый раёна, дзяржаўныя і прыватныя структуры, установы культуры, адукацыі, творчыя калектывы, індывідуальныя выканаўцы па розных відах і жанрах народнай творчасці, майстры дэкаратыўна-прыкладной творчасці і інш.

Арганізатарамі фестывалю выступаюць Клічаўскі раённы выканаўчы камітэт, аддзел ідэалагічнай работы, культуры і па справах моладзі Клічаўскага райвыканкама.

Адкрыццё свята ў 14.00.