Фінальнае мерапрыемства рэспубліканскай дабрачыннай акцыі «Аднаўленне святынь. Крыніцы Беларусі» пройдзе ў Магілёве 29 жніўня. У гэты дзень валанцёры руху БРСМ «Добрае сэрца» дапамогуць добраўпарадкаваць адразу дзве святыні абласнога цэнтра.

У цэнтры маладзёжнага клопату акажацца тэрыторыя сінагогі іўдзейскай рэлігійнай грамады Магілёва (вул. Вялікая Грамадзянская, 13, гарадскі парк у Падніколлі). Добраахвотнікі БРСМ пакосяць тут траву, прыбяруць будаўнічае смецце, пафарбуюць лаўкі і адлівы.

Таксама будзе добраўпарадкавана тэрыторыя храма ў гонар Раства Іаана Хрысціцеля ў аграгарадку Буйнічы. Тут валанцёры дапамогуць вынесці будаўнічае смецце, памыюць вокны, выраўнуюць участак каля царквы.

Як заўважылі ў абласным камітэце ГА «БРСМ», храм пачалі будаваць у жніўні 2017 года. Ён узводзіцца на сродкі Беларускай Праваслаўнай Царквы і вернікаў на самым краі мемарыяльнага комплексу «Буйніцкае поле», бліжэй да жылога масіва. На гэты момант у храме вядуцца аздобныя працы.