Свята для пажылых людзей пройдзе ў парку Падніколля Магілёва 26 верасня з 14.00 да 17.00. Пра гэта паведамілі ў Магілёўскім гарвыканкаме.

Мерапрыемства пад назвай «Дзень дабра і павагі» прымеркавана да Міжнароднага дня пажылых людзей. У яго праграме – канцэртная праграма, якая будзе прадстаўлена адразу на некалькіх пляцоўках. Яшчэ адна пазнаёміць удзельнікаў свята з кніжнымі навінкамі. Пляцоўка фінансавай граматнасці дапаможа людзям пенсійнага ўзросту асвоіць методыку аплаты камунальных паслуг праз сучасныя гаджэты.

Ветэраны працы арганізуюць для гасцей выставы выпечкі, дэкаратыўна-прыкладнога мастацтва з магчымасцю правядзення майстар-класа па адным з яго відаў, сабранага ў бягучым годзе ўраджаю. У наведвальнікаў свята будзе магчымасць асвоіць беларускія народныя танцы. Запланавана работа гандлёвых радоў.