Памятны знак знакамітаму земляку Сяргею Грахоўскаму ўсталявалі каля школы ў Глуску. Беларускі паэт, публіцыст, празаік, перакладчык – ганаровы грамадзянін Глуска. Глуская школа № 1 носіць яго імя..

Увекавечыць памяць земляка вырашылі педагогі. Яны ж і ўвасобілі задуму. Скульптар – настаўнік працы школы № 2, мастак Аляксандр Гулевіч. Мемарыяльны знак уяўляе з сябе адкрытую кнігу з барэльефам Грахоўскага і ўрыўкам з яго верша:

Мой родны кут –
Вытока ўсіх вытокаў
Перад табой схіляю галаву
І адчуваю сiлу родных токаў
Дзеля цябе працую і жыву.

А ў найбліжэйшай будучыні побач з мемарыяльным знакам збіраюцца ўсталяваць фотагалерэю, якая расказвае пра лёс і творчую спадчыну Сяргей Грахоўскага. Ён аўтар каля 60 кніг, лаўрэат Дзяржаўнай прэміі імя Якуба Коласа, працаваў у часопісах, на радыё, быў настаўнікам у школе і выкладаў літаратуру ва ўніверсітэце, прайшоў сталінскія лагеры. Нягледзячы на ўзрост, з пачаткам гарбачоўскай перабудовы актыўна ўключыўся ў працу па дэмакратызацыі грамадства, рэабілітацыі ахвяр сталінскіх рэпрэсій, адстойванні правоў кожнага нявінна асуджанага. Памёр у 2002 годзе.

mogilevnews.by