Магілёўскі дзяржаўны ўніверсітэт харчавання і Азербайджанскі дзяржаўны аграрны ўніверсітэт падпісалі дагавор аб супрацоўніцтве. Пра гэта паведамляецца на сайце МДУХ.

Зацвярджэнне дакумента адбылося падчас візіту рэктара Азербайджанскай ВНУ Ібрагіма Джафарава і дырэктара Цэнтра падрыхтоўкі магістраў Агіла Мустафаева ў Магілёўскі ўніверсітэт.

Госці сустрэліся з кіраўніцтвам МДУХ і абмеркавалі пытанні, звязаныя з удзелам у сумесных адукацыйных праграмах, рэалізацыяй акадэмічнай мабільнасці, іншыя напрамкі супрацоўніцтва. Прайшоў дыялог з супрацоўнікамі і студэнтамі нашай ВНУ, падчас якога адбылася прэзентацыя Азербайджанскага аграрнага ўніверсітэта. Ібрагім Джафараў і Агіл Мустафаеў наведалі выставу навуковых распрацовак універсітэта, цэнтр дыстанцыйнага навучання, відэастудыю, навукова-вытворчую і навукова-галіновую лабараторыі збожжавых прадуктаў, лабараторыі кафедраў, прынялі ўдзел у круглым стале «Удзел у працы па міжнародных праектах HORIZON і ERASMUS+».