У Бабруйску праходзіць Тыдзень тэхнічнай творчасці «Юнацтва. Інтэлект. Будучыня». Пра гэта паведаміла загадчыца аддзела тэхнічнай творчасці Цэнтра творчасці дзяцей і моладзі горада Таццяна Кізатава.

Падчас Тыдня навучэнцы аддзела тэхнічнай творчасці Цімафей Грышкоў і Максім Корзун пад кіраўніцтвам педагога дадатковай адукацыі Яўгена Смірнова прымуць удзел у абласным этапе рэспубліканскага конкурсу інавацыйнай і тэхнічнай творчасці навучэнскай моладзі «Ні-Tech» у кампетэнцыі «Мабільная робататэхніка». Надзея Абазовік і Ксенія Чарняўская з педагогам Ганнай Ашурка прадставяць Бабруйск у гэтым жа конкурсе ў кампетэнцыі «Камп’ютарная графіка». Конкурс адбудзецца сёння ў Магілёве.

Акрамя таго, Цэнтр дадатковай адукацыі не пакінуў без увагі жыхароў Бабруйска. 2 лістапада ў 11.00 па вул. Сацыялістычная, 90 адбудзецца дзень адчыненых дзвярэй у аддзеле тэхнічнай творчасці. Запланаваны прэзентацыі, выстава работ навучэнцаў, выступленне калектываў мастацкай самадзейнасці, урок па робататэхніцы і інш. Бабруйчане змогуць наведаць лабараторыі, пазнаёміцца з педагогамі тэхнічнага напрамку, задаць пытанні.

Тыдзень тэхнічнай творчасці праводзіцца з мэтай актывізацыі моладзі, прываблівання навучэнцаў да заняткаў інавацыйнай, тэхнічнай творчасцю, вынаходніцкай і рацыяналізатарскай дзейнасцю, памнажэння навуковага патэнцыялу горада.