Магілёўская абласная арганізацыя Беларускага рэспубліканскага саюза моладзі 5 лістапада правядзе ў Магілёве семінар-вучобу для актывістаў, якія прапаноўваюцца саюзам для ажыццяўлення назірання на выбарчых участках рэгіёна падчас выбараў дэпутатаў у Палату прадстаўнікоў Нацыянальнага сходу Рэспублікі Беларусь сёмага склікання.

Навучальнае мерапрыемства пачнецца ў 11.00 у Магілёўскім дзяржаўным універсітэце харчавання (пр-т Шміта, 3, корпус 2, аўд. 611). На семінар запрошана 60 назіральнікаў і штатных работнікаў Магілёўскай абласной арганізацыі БРСМ з усіх раёнаў Прыдняпроўскага краю.

Падчас вучобы адбудзецца інтэнсіў з удзелам спецыялістаў і трэнераў у галіне псіхалогіі, выбарчага заканадаўства. Тут таксама раскажуць аб ролі і патрабаваннях, што прад’яўляюцца да назіральнікаў, асноўных момантах іх працы. Завершыць семінар дзелавая гульня «Азбука грамадзяніна», дзе маладыя людзі пры дапамозе мадэлявання розных сітуацый будуць уключаны ў працэсы ўзаемадзеяння адзін з адным, у працу беларускага ўрада і парламента.

Як растлумачылі ў АК ГА «БРСМ», з моманту стварэння ўчастковых камісій прадстаўнікі Магілёўскай абласной арганізацыі БРСМ атрымліваюць статус назіральнікаў. Падчас датэрміновага галасавання і непасрэдна ў дзень выбараў назіральнікі будуць ажыццяўляць кантроль за ходам выбараў дэпутатаў на выбарчых участках.