Магілёўская абласная арганізацыя БРСМ запрашае выбаршчыкаў паўдзельнічаць у фотаконкурсе «#Галасую». Каб прыняць удзел у спаборніцтве, неабходна зрабіць фота або сэлфі на выбарчым участку ў дні датэрміновага галасавання або 17 лістапада, апублікаваць здымак на сваёй старонцы УКантакце або запісе ў Instagram, суправадзіць фатаграфію хэштэгамі #ягаласую #МыРазам #МыІдзём #mogbrsm і адзначыць у публікацыі акаўнт @mogbrsm.

«Сёння ў большасці выпадкаў моладзі ўжо не трэба тлумачыць, чаму важна прыйсці на выбары. Таму наша асноўная задача – зрабіць удзел моладзі ў выбарчай кампаніі цікавым і запамінальным. Абласны фотаконкурс «#Галасую» – гэта вынік падтрымкі нашымі актывістамі ініцыятывы моладзі з Мінска. Вынікі свайго конкурсу мы падвядзём 19 лістапада. Інфармацыя будзе размешчана ў нашых сацыяльных сетках УКантакце і Instagram. Пераможца атрымае зарадную прыладу PowerBank ад абласной арганізацыі саюза моладзі», – расказалі суразмоўцы.