Магілёўскі абласны камітэт БРСМ прапануе моладзі паўдзельнічаць у інтэрнэт-акцыі «Разам дзеля жыцця». Праект ужо стартаваў у рэгіёне і будзе доўжыцца да 3 снежня. Конкурс прымеркаваны да Сусветнага дня барацьбы са СНІДам, які традыцыйна адзначаецца 1 снежня.

Прыняць удзел у акцыі нескладана. Для гэтага неабходна арганізаваць і правесці тэматычны флэшмоб. Маладым людзям прапануецца выстраіцца ў выглядзе сімвала барацьбы са СНІДам – чырвонай стужачкі. Атрыманую фігуру варта абавязкова зафіксаваць на фота ці відэа і размясціць у Instagram Facebook, YouTube з абавязковым выкарыстаннем хэштэгаў #mogbrsm, #супраць_СНІДу, #Разам_дзеля__жыцця, #СНІДу_не, #ЗЛЖ, #Вelarus, #чырвоная_стужачка.

Па выніках акцыі аўтары работ-пераможцаў будуць узнагароджаны дыпломамі і каштоўнымі падарункамі ў намінацыях: «Найлепшае відэа», «Найлепшае фота», «Самы яркі флэшмоб».

Акрамя таго, работы пераможцаў размесцяць на інтэрнэт-партале «Моладзь Магілёўшчыны» http://www.brsmok.mycity.by, а таксама ў сацыяльных сетках.