Роўны навучае роўнага – такую практыку ў Магілёўскім дзяржаўным медыцынскім каледжы ўжываюць нярэдка. На гэты раз пра важнасць імунізацыі супраць грыпу навучэнцы медкаледжа расказалі аднагодкам з сацыяльна-гуманітарнага каледжа УА «Магілёўскі дзяржаўны ўніверсітэт імя А. А. Куляшова».

Практычная частка дыялогу была інтэрактыўнай і займальнай. Хлопцы і дзяўчаты ўжывалі навучальныя гульні. Адной з іх стала дэманстрацыя шляхоў перадачы віруса грыпу.

«У самым пачатку сустрэчы навучэнцы вельмі хваляваліся. Цяжка выступаць у якасці лектара перад аднагодкамі, але ў выніку моладзь хутка знайшла агульную мову, настроілася на адную хвалю. У выніку ўсё атрымалася, – падзяліўся назіраннямі старшыня прафсаюзнага камітэта навучэнцаў медкаледжа Кірыл Шусцік. – У будучым часта давядзецца займацца асветнай дзейнасцю. Бо ісціна вядомая ўсім: хваробу лягчэй прадухіліць, чым лячыць яе і наступствы».

Будучыя медыкі адзначылі важнасць такіх заняткаў. Па-першае, рухомыя гульні заўсёды цікавейшыя за сумныя лекцыі. Па-другое, адсутнасць розніцы ва ўзросце дазваляе дзецям адчуваць сябе больш упэўнена і спакойна, задаваць дадатковыя пытанні без сарамлівасці. Такія пазнавальныя і гульнявыя трэнінгі дазваляюць аднагодкам не толькі даведацца новае, але і разабрацца з тым, як трэба берагчы сваё здароўе. Правільнае харчаванне, вітаміны і своечасовая вакцына ад грыпу – падобная інфармацыя напісана на інфармацыйных лістках ва ўсіх установах горада. Але адна справа аб гэтым напісаць і зусім іншая – паказаць.