Статус дэпутата не робіць чалавека асаблівым, але надзяляе высокай адказнасцю. Такім меркаваннем падзялілася дэпутатка Палаты прадстаўнікоў Нацыянальнага сходу Наталля Тарасенка, абраная па Магілёўскай сельскай акрузе № 88.

«Мы ўсе сутыкаемся з пэўнымі праблемамі. І абраны дэпутат – не выключэнне. Нас усіх хвалюе адно і тое ж: даступнасць і якасць адукацыі, наяўнасць месцаў у дзіцячых садках, стан дарог і чысціня вады. Я пераканалася ў гэтым падчас сустрэч з выбаршчыкамі. Статус дэпутата не робіць чалавека нейкім асаблівым, а вось адказнасцю надзяляе. Калі людзі цябе выбралі – значыць яны паверылі ў тое, што ты можаш нешта змяніць», – падзялілася Наталля Тарасенка.

На яе думку, быць дэпутатам такога высокага ўзроўню – ганаровая місія. «Гэта будзе новая і складаная праца. Стаць дэпутатам Нацыянальнага сходу Рэспублікі Беларусь – гэта значыць не забываць пра выбаршчыкаў, знаходзіць час для працы з імі на месцах», – падкрэсліла Наталля Тарасенка.

Адным з важных напрамкаў сваёй дзейнасці ў якасці парламентарыя яна назвала працу ў галіне адукацыі. «Я шмат гадоў працую ў гэтай сферы. І аб кожнай дробязі ведаю не па чутках. Ёсць праблемныя пытанні, для якіх неабходна знайсці рашэнне. Напрыклад, можна пашырыць вопыт стварэння невялікіх дзіцячых садоў на першых паверхах шматкватэрных дамоў. Неабходна надаць увагу і стварэнню прыватных дзіцячых садоў», – патлумачыла дэпутат.

Таксама важным яна лічыць клопат аб пажылых людзях, падкрэслівае неабходнасць стварэння спецыялізаваных дамоў сумеснага пражывання для іх.

БЕЛТА