Беларуска-Расійскі ўніверсітэт падпісаў дагавор аб супрацоўніцтве з Нішскім універсітэтам Сербіі. Зацвярджэнне дакумента адбылося сёння ў Бялградскім універсітэце ў межах сербска-беларускага бізнес-форуму. Подпісы пад дагаворам паставілі рэктар БРУ Міхаіл Лусцянкоў і прарэктар па міжнародным супрацоўніцтве Нішскага ўніверсітэта прафесар, доктар філалагічных навук Весна Лопічыч.

Падпісанне дагавора з еўрапейскай ВНУ мае стратэгічнае значэнне для магілёўскай ВНУ, падкрэслілі ў Беларуска-Расійскім універсітэце. Нішскі універсітэт – трэцяя па велічыні ВНУ Сербіі. Яна з’яўляецца шматпрофільнай, але сярод асноўных напрамкаў – тэхніка і тэхналогіі.

Дарэчы, толькі дзве вышэйшыя навучальныя ўстановы Беларусі афіцыйна былі заяўлены для падпісання дагавораў з сербскімі ўніверсітэтамі. Акрамя БРУ, гэта Гродзенскі дзяржаўны ўніверсітэт імя Я. Купалы.

Фота - bru.by