Навагодні баль для адораных і таленавітых дзяцей пройдзе ў Бабруйску 14 снежня. Пра гэта паведаміла намеснік старшыні Бабруйскага гарвыканкама Вікторыя Амялюсік.

«Навагодні баль для адораных і таленавітых дзяцей стане адным з першых мерапрыемстваў, прымеркаваных да рэспубліканскай акцыі «Нашы дзеці». Гэтым разам ён адбудзецца 14 снежня ў Палацы мастацтваў. Сёлета ўдзельнікамі мерапрыемства стане больш за 130 дзяцей, старэйшых за 15 гадоў», – расказала яна.

Традыцыйна ўдзельнікамі балю будуць выдатнікі вучобы, пераможцы алімпіяд і творчых конкурсаў. Павіншаваць дзяцей прыйдзе старшыня Бабруйскага гарвыканкама Аляксандр Студнеў, прадстаўнікі структурных падраздзяленняў выканкама і грамадскіх аб’яднанняў горада.

У гэты ж дзень у Палацы мастацтваў пройдзе яшчэ адно маштабнае свята. «У нашым горадзе ў розных школах ёсць 4 профільныя класы. Дзеці праходзяць навучанне па напрамках МНС і Следчага камітэта. Ёсць ваенна-патрыятычны клас і клас прававой накіраванасці. Кожны год у гэтых школах праходзілі ўрачыстыя мерапрыемствы, дзе дзяцей прысвячалі ў выбраную прафесію, – яны атрымлівалі права на нашэнне спецыяльнай формы, якую шыюць для кожнага класа асобна. Сёлета мы вырашылі аб’яднаць гэта прысвячэнне ў адно вялікае свята – яго гасцямі стане больш за 100 дзяцей», – сказала Вікторыя Амялюсік.

БЕЛТА