Ініцыятыва па ўшанаванні памяці беларускага пісьменніка Алеся Адамовіча ў пасёлку Глуша Бабруйскага раёна атрымала прэмію беларускага нацыянальнага маладзёжнага савета Rada Аwards 2019. Па выніках галасавання яе назвалі лепшым маладзёжным праектам года ў сферы захавання культурнай спадчыны. 

У лістападзе 2019 года ў пасёлку Глуша Бабруйскага раёна ўрачыста адкрылі першы ў Беларусі помнік знакамітаму пісьменніку і публіцысту Алесю Адамовічу. Гэтая падзея і стала вынікам ініцыятывы, з якой выступілі грамадскія актывісты. Грошы на бюст сабралі талакой, у інтэрнэце.

А пачыналася ўсё з ініцыятывы ураджэнца Бабруйска Андрэя Архіпенкі. Ён вырашыў захаваць памяць пра любімага пісьменніка і земляка. І першы крок ўдалося зрабіць у мінулым годзе, калі ў Глушы з'явіўся прыпынак Адамовіча. Цяпер ён – мясцовая славутасць.

Усяго на прэмію было пададзена 190 заявак. У фінал намінацыі па захаванні культурнай спадчына трапілі 5 намінантаў. І менавіта ініцыятыва па захаванні памяці Алеся Адамовіча атрымала статуэтку. Але гэта толькі пачатак. Зараз працягваецца збор сродкаў, каб стварыць музей Алеся Адамовіча ў будынку былой аптэкі, дзе працавала маці пісьменніка і часова жыла яго сям’я. Сама прэмія дазволіла нагадаць моладзі, што ў кожнай справе галоўнае – ініцыятыва і жаданне.

ТРК «Магілёў»