Абласны Цэнтр бяспекі МНС 28 снежня запрашае магілёўцаў на першы Дзень нараджэння. Святочнае мерапрыемства пачнецца ў Пажарным завулку, д. 6 у 12.30.

Гасцей чакаюць гульні, віктарыны, розыгрышы прызоў, роставыя лялькі, Дзед Мароз і Снягурка. Усе жадаючыя змогуць пакаштаваць стравы палявой кухні, а таксама прадукцыю Магілёўскай фабрыкі марожанага і булачна-кандытарскай кампаніі «Домочай». Таксама тут адбудзецца святочны канцэрт, захапляльны флэшмоб.

Цэнтр бяспекі сёлета наведалі больш за 17 тыс. дзяцей і дарослых. На гэтую сучасную інтэрактыўную пляцоўку для навучання прыязджаюць не толькі магілёўцы, але і госці з усёй вобласці.

У цэнтры бяспекі некалькі тэматычных блокаў. Кожны аформлены пад канкрэтны сцэнар з рэальнага жыцця: ад ядзернай бяспекі – да правілаў паводзін у час навальніцы. Тут створана безбар’ернае асяроддзе, каб навучанне было даступным людзям з інваліднасцю. Дарослыя і дзеці даведаюцца, як правільна дзейнічаць у надзвычайных сітуацыях, а дапамагаюць у гэтым сучасныя тэхналогіі.

Навучанне праводзіцца за кошт тэхналогій з выкарыстаннем дапоўненай рэальнасці, у аснове якіх – віртуальнае заглыбленне навучэнцаў у асяроддзе, якое імітуе надзвычайную сітуацыю. Гэта значна павышае эмацыйнае ўспрыманне мадэляванай абстаноўкі. Матэрыял засвойваецца лягчэй і запамінаецца надоўга. Асаблівы экшн – лабірынт з задымленнем.