У Чэрыкаве сёння адкрыюць новы будынак раённай пракуратуры. Пра гэта паведаміла старшы памочнік пракурора Магілёўскай вобласці па прававым забеспячэнні, інфармацыі і грамадскіх сувязях саветнік юстыцыі Алена Шумейка.

Пракуратура раёна доўгі час размяшчалася ў пабудове канца 40-х гадоў мінулага стагоддзя, якая пасля была прызнана аварыйнай, у сувязі з чым адбыўся пераезд у будынак Чэрыкаўскага РАУС.

Новы будынак пабудаваны і здадзены пад ключ у самыя кароткія тэрміны дзякуючы прафесійнай і зладжанай рабоце спецыялістаў Касцюковіцкай ПМК № 260, якая выступала падрадчыкам будаўніцтва.

Двухпавярховы будынак абсталяваны з улікам сучасных тэндэнцый. Тут створаны неабходныя ўмовы для якаснай і эфектыўнай працы, набыта новая мэбля і аргтэхніка, добраўпарадкавана прылеглая тэрыторыя.

Камфортней стане і наведвальнікам пракуратуры. У новым будынку ёсць памяшканне для прыёму грамадзян, у тым ліку людзей з абмежаванымі магчымасцямі.