Чалавек не павінен абыходзіць усе інстанцыі, каб вырашыць сваю праблему. На гэта звярнуў увагу старшыня Магілёўскага аблвыканкама Леанід Заяц падчас асабістага прыёму грамадзян у Магілёве.

«Праца органаў улады павінна быць накіравана на паляпшэнне якасці жыцця грамадзян. Чалавек не павінен абыходзіць усе інстанцыі, каб вырашыць сваю праблему. Калі ён сутыкнуўся з нейкай сітуацыяй, мы павінны разам разабрацца ў тым, што здарылася», – сказаў Леанід Заяц.

На прыём да губернатара звярнулася некалькі жыхарак Магілёва. Жанчыны працавалі на прадпрыемстве, якое праходзіць цяпер працэдуру банкруцтва. Пасля звальнення зарплату ім не выплацілі, а гэта каля Br3 тыс. Старшыня Магілёўскага аблвыканкама запэўніў, што на працягу двух месяцаў магіляўчанкі атрымаюць свае грошы. Пытанне ўзята на кантроль у аблвыканкаме. Пры гэтым Леанід Заяц пацікавіўся, ці змаглі жанчыны знайсці сабе новую працу. Яны адказалі, што з працай праблем няма: хтосьці выйшаў на пенсію, а хтосьці ўжо працуе на новым месцы.

«Калі прадпрыемства становіцца банкрутам, супрацоўнікі першымі адчуваюць удар. І на гэты конт у дзяржавы ёсць механізмы, якія гарантуюць, што кожны атрымае тое, што зарабіў, – пракаментаваў Леанід Заяц. – Аднак цяпер трэба крыху пачакаць. Мы ў самыя кароткія тэрміны пастараемся цалкам закрыць гэтую праблему».

З зямельным пытаннем прыйшоў да старшыні аблвыканкама жыхар Магілёва. У 2006 годзе ён атрымаў у дар участак у вёсцы Прысна-1 Магілёўскага раёна. Мужчына пачаў будаваць тут дом, але няўважліва сачыў за працай будаўнікоў. У выніку будынак выйшаў за межы яго зямлі, і магілёвец не можа атрымаць дакументы. Ён не гатовы зносіць свой дом, таму прыйшоў па дапамогу ў аблвыканкам.

Усяго на прыём да старшыні аблвыканкама звярнуліся адзінаццаць чалавек.

БЕЛТА