Больш за 560 прадстаўнікоў таленавітай моладзі Магілёўшчыны атрымае пашпарты ў межах Усебеларускай акцыі «Мы – грамадзяне Беларусі!», прысвечанай Дню Канстытуцыі. Пуцёўкі ў дарослае жыццё падлеткам уручаць прадстаўнікі органаў улады, грамадскія дзеячы і іншыя заслужаныя людзі рэгіёна, паведамілі ў галоўным упраўленні ідэалагічнай работы і па справах моладзі аблвыканкама.

Ініцыяваная ў 2004 годзе БРСМ акцыя здабыла агульнанацыянальны статус. Сёлета ўрачыстыя ўручэнні пашпартоў грамадзяніна Беларусі 14-гадовым юнакам і дзяўчатам пройдуць па ўсёй краіне з 10 па 15 сакавіка пад слоганам # раЗАм .

Абласное мерапрыемства адбудзецца 14 сакавіка ў 10.00 у Палацы культуры вобласці. Тут самы важны ў жыцці дакумент з рук кіраўніцтва рэгіёна атрымае 27 юных жыхароў Прыдняпроўскага краю, у ліку якіх выдатнікі вучобы, пераможцы алімпіяд, конкурсаў і спаборніцтваў.

«Гэта мерапрыемства глыбока сімвалічнае. Хлопцы і дзяўчаты не проста атрымаюць пашпарты і стануць паўнапраўнымі грамадзянамі краіны, але і прымуць на сябе адказнасць за свае ўчынкі», – адзначылі суразмоўцы.