Міністэрства аховы здароўя ўстанавіла правілы паводзінаў у самаізаляцыі людзей, якія прыбылі з краін, у якіх рэгіструюцца выпадкі інфекцыі COVID-19. Гэта прадугледжана пастановай Міністэрства № 24 ад 31 сакавіка 2020 года, паведамляецца на Нацыянальным прававым інтэрнэт-партале.

У прыватнасці, людзі, якія прыбылі з-за мяжы, не павінны пакідаць месца пражывання (знаходжання), у тым ліку наведваць месцы працы (вучобы), магазіны, гандлёвыя цэнтры, аб’екты грамадскага харчавання, спартыўныя, выставачныя і канцэртныя залы, кінатэатры, вакзалы і іншыя месцы масавага знаходжання людзей, за выключэннем выпадкаў крайняй неабходнасці.

Для набыцця тавараў трэба карыстацца паслугамі інтэрнэт-магазінаў. Пры гэтым варта выключыць непасрэдны кантакт з дастаўшчыкамі тавараў.

Паказваецца на неабходнасць выконваць гігіенічныя мерапрыемствы: старанна мыць рукі з мылам не менш за 20 секунд або карыстацца антысептыкам для апрацоўкі рук, а аднаразовыя насоўкі або сурвэткі ўтылізаваць ў закрыты смеццевы кантэйнер або пластыкавы пакет.

Пры пагаршэнні стану здароўя (павышэнне тэмпературы цела да 37 градусаў і вышэй, кашаль, адышка) трэба звярнуцца ў хуткую медыцынскую дапамогу, патэлефанаваўшы па нумары 103 або адправіўшы SMS. Пры гэтым трэба паведаміць пра сваё знаходжанне ў краінах, у якіх рэгіструюцца выпадкі інфекцыі COVID-19, і пра знаходжанне ў самаізаляцыі.

Пастанова ўступае ў сілу пасля афіцыйнага апублікавання.

Як паведамлялася, усе, хто прыбыў у Беларусь з краін, у якіх рэгіструюцца выпадкі інфекцыі COVID-19, на працягу 14 каляндарных дзён з дня прыбыцця ў Беларусь павінны знаходзіцца ў самаізаляцыі ў хатніх умовах. Пералік такіх краін апублікаваны на сайце Міністэрства аховы здароўя.

БЕЛТА