Восеньскія сельскагаспадарчыя кірмашы плануюць правесці на Магілёўшчыне. Пра гэта паведаміла намеснік начальніка галоўнага ўпраўлення гандлю і паслуг аблвыканкама Вераніка Цітова.

Плодаагароднінныя кірмашы маюць намер арганізаваць ва ўсіх гарадах і раённых цэнтрах рэгіёна. Рашэнні аб іх правядзенні, як звычайна, будуць прымаць гарадскія і раённыя выканкамы. Яны ж вызначаць даты і пляцоўкі пад размяшчэнне гандлёвых радоў.

У гэты раз у працу восеньскіх кірмашоў унясуць змены. Прадаўцы будуць працаваць у масках і пальчатках. Пункты продажаў забяспечаць антысептыкамі для апрацоўкі рук.

На восеньскіх кірмашах будзе прадстаўлены поўны асартымент сельскагаспадарчай прадукцыі – ад садавіны і агародніны новага сезона да мяса, рыбы і саджанцаў. Тавары прадставяць сельгасвытворцы, фермеры і фізічныя асобы. Старт восеньскім кірмашам у нашым рэгіёне плануюць даць з сярэдзіны верасня.

«Радыё Магілёў»