Часта на пошукі працы адводзіцца працяглы перыяд часу, нават некалькі месяцаў. І калі ўсё ж праца знойдзена, многія саіскальнікі падпісваюць дагавор «не гледзячы», не разумеючы, якія пры гэтым наступствы іх могуць чакаць у далейшым.

Пры падпісанні дагавора неабходна выразна ўсведамляць, які менавіта дагавор вы падпісваеце – дагавор падраду або працоўны дагавор (кантракт).

У адпаведнасці з нормамі артыкула 1 Працоўнага кодэкса Рэспублікі Беларусь (далей – ПК) працоўны дагавор – гэта пагадненне паміж работнікам і наймальнікам, у адпаведнасці з якім работнік абавязваецца выконваць абавязкі па прафесіі, спецыяльнасці або пасадзе згодна са штатным раскладам, а наймальнік абавязваецца прадастаўляць работніку абумоўленую працоўным дагаворам працу, а таксама забяспечваць ўмовы і аплату працы ў адпаведнасці з заканадаўствам аб працы.

Такім чынам, пры заключэнні з наймальнікам працоўнага дагавора (кантракта) на работніка распаўсюджваюцца ўсе нормы, прадугледжаныя працоўным заканадаўствам.

Згодна з пунктам 2 артыкула 6 ТК адносіны, якія ўзнікаюць на аснове дагавораў падраду, не падпадаюць пад дзеянне ТК. Такім чынам, гарантыі і кампенсацыі, прадугледжаныя ТК, не распаўсюджваюцца на асоб, якія працуюць па дагаворы падраду.

Так, напрыклад, асобам, якія выконваюць работы па дагаворах падраду, не ўносіцца запіс аб рабоце ў працоўную кніжку, ім не гарантуецца выплата мінімальнай заработнай платы, не выплачваюцца кампенсацыі за працу ў звышвызначаны час, у дзяржаўныя святы, святочныя і выходныя дні, даплаты за працу ў начны час, не прадастаўляюцца працоўныя і сацыяльныя адпачынкі, на іх не распаўсюджваецца дзеянне калектыўных дагавораў і інш.