У 2018 годзе права на працоўную пенсію па ўзросце на агульных падставах прадастаўляецца мужчынам па дасягненні ўзросту 61 год, жанчынам – 56 гадоў.

Адпаведна на 1 год павялічваецца ўзрост для прызначэння датэрміновых пенсій па ўзросце (за работу з асаблівымі ўмовамі працы, у адпаведнасці з законамі Рэспублікі Беларусь «Аб сацыяльнай абароне грамадзян, якія пацярпелі ад катастрофы на Чарнобыльскай АЭС, іншых радыяцыйных аварый», «Аб занятасці насельніцтва Рэспублікі Беларусь») і за выслугу гадоў.

Звяртаем увагу, што ўзрост выхаду на пенсію вызначаецца на дату звароту за прызначэннем пенсіі. Так, калі жанчыны, якія нарадзіліся ў першым паўгоддзі 1962 г. i мужчыны, якія нарадзіліся ў першым паўгоддзі 1957 г., не рэалізавалі права на пенсію па ўзросце ў другім паўгоддзі 2017 года, то у 2018 годзе пенсія ім можа быць прызначана па дасягненні ўзросту адпаведна 56 гадоў і 61 год.

Для прызначэння у 2018 годзе працоўнай пенсіі па ўзросце, у тым ліку пры няпоўным стажы працы, датэрміновай пенсій, а таксама пенсіі за выслугу гадоў, патрабуецца не менш за 16 гадоў 6 месяцаў стажу працы з выплатай абавязковых страхавых узносаў у бюджэт дзяржаўнага пазабюджэтнага фонду сацыяльнай абароны насельніцтва Рэспублікі Беларусь згодна з заканадаўствам аб дзяржаўным сацыяльным страхаванні (далей – страхавы стаж).

Страхавы стаж меншай працягласці патрабуецца для прызначэння пенсій па ўзросце асобным катэгорыям грамадзян:

не менш за 5 гадоў – для прызначэння датэрміновых пенсій па ўзросце бацькам дзяцей-інвалідаў (інвалідаў з дзяцінства); шматдзетным маці, якія нарадзілі пяць і больш дзяцей; інвалідам з дзяцінства; інвалідам вайны; маці ваеннаслужачых, смерць якіх звязана з выкананнем абавязкаў ваеннай службы; ліліпутам і карлікам;

не менш за 10 гадоў – для назначэння пенсiй па ўзросце на агульных падставах грамадзянам, якія маюць працяглы стаж работы (не менш за 40 гадоў у мужчын і не менш за 35 гадоў у жанчын), а таксама грамадзянам, у якіх маецца не менш за 10 каляндарных гадоў ваеннай службы (службы ў ваенізаваных арганізацыях) пры наяўнасці агульнага стажу працы не менш за 25 гадоў у мужчын і не менш за 20 гадоў у жанчын і адсутнасці права на пенсію ў адпаведнасці з заканадаўствам аб пенсійным забеспячэнні ваеннаслужачых.

Даведачна: згодна з часткай першай артыкула 51 Закона Рэспублікі Беларусь «Аб пенсійным забеспячэнні» ў стаж працы залічваюцца перыяды работы, прадпрымальніцкай, творчай i iншай дзейнасцi пры ўмове, што на працягу гэтых перыядаў ажыццяўлялася выплата абавязковых страхавых узносаў у бюджэт фонду згодна з заканадаўствам аб дзяржаўным сацыяльным страхаванні .

Іншыя перыяды, прадугледжаныя часткай другой артыкула 51 названага Закона, у тым ліку ваеннай службы, атрымання прафесійна-тэхнічнай, сярэдняй спецыяльнай, вышэйшай адукацыі ў дзённай форме, догляду дзяцей ва ўзросце да 3 гадоў, інвалідаў 1 групы і асоб, якія дасягнулі 80-гадовага ўзросту, атрымання дапамогі па беспрацоўі і інш., у страхавы стаж для вызначэння права на працоўную пенсію не залічваюцца. Дадзеныя перыяды пры наяўнасцi права на працоўную пенсію ўключаюцца ў стаж працы для падліку памеру працоўнай пенсіі.

Асобам, якія рэалізуюць сваё права на пенсію ў 2018 годзе, заробак для вылічэння пенсіі вызначаецца за апошнія 24 гады бесперапыннага стажу працы, але не больш чым за фактычна існуючы стаж.

Даведачна: звесткі пра заработную плату да 1 студзеня 2003 года пацвярджаюцца даведкай аб памеры заробку, якая выдаецца працадаўцам (яго правапераемнікам), архівам на падставе звестак і дакументаў бухгалтарскага ўліку. За перыяды работы пасля 1 студзеня 2003 года памер заробку пацвярджаецца выпіскай з індывідуальнага асабовага рахунку застрахаванай асобы, якая выдаецца раённымі аддзеламі Фонду сацыяльнай абароны насельніцтва Міністэрства працы і сацыяльнай абароны Рэспублікі Беларусь.

Грамадзянам, якія не маюць права на працоўную пенсію па ўзросце, можа быць прызначана сацыяльная пенсія па дасягненні ўзросту мужчынамі – 65 гадоў, жанчынамi – 60 гадоў.