Абласное свята «Зажынкі-2017» дало 2 жніўня афіцыйны старт масавай уборачнай кампаніі ў Магілёўскай вобласці. Урачыстасць арганізавалі на базе ААТ “Палыкавічы” Магілёўскага раёна. У мерапрыемстве прынялі ўдзел старшыня Магілёўскага аблвыканкама Уладзімір Даманеўскі, памочнік Прэзідэнта – галоўны інспектар па Магілёўскай вобласці Генадзь Лаўранкоў, першы намеснік старшыні Магілёўскага аблвыканкама Алег Чыкіда, старшыні раённых выканаўчых камітэтаў, аграрыі рэгіёна. Для гасцей свята на палявым стане правялі тэатралізаваную праграму, у напевах і танцах апавядалі аб сялянах і іх нялёгкай працы, якая робіць ніву урадлівай, а каласы цяжкімі. Жнеі сабралі першы сноп – «гаспадарок» – і ўручылі яго кіраўніку Прыдняпроўскага краю. Акрамя таго, губернатару паднеслі каравай са збожжа 2016 года. Першыя снапы як сімвалы будучага багатага ўраджаю перадалі таксама старшыням усіх райвыканкамаў.