У Магілёўскай вобласці двухтысячную мяжу па намалоце і перавозцы збожжа ўзялі два экіпажы камбайнераў і два кіроўцы ЗАТ «Агракамбінат “Зара”» (Магілёўскі раён). Лідары жніва пераступілі запаветную рысу 9 жніўня пасля заходу сонца, калі на полі ўжо пачала паказвацца раса. Першымі ў рэгіёне 2 тыс. т. ураджаю сабралі старшы камбайнер Уладзімір Мельнікаў і камбайнер Аляксей Макосаў, а таксама экіпаж вядомай у раёне дынастыі камбайнераў бацькі і сына Корсакаў. Сярод кіроўцаў вызначыліся Юрый Манкевіч і Лангуры Хасія. З высокім дасягненнем перадавікоў павіншаваў на полі старшыня Магілёўскага аблвыканкама Уладзімір Даманеўскі. Ён уручыў перадавікам падзякі і каштоўныя падарункі. Камбайнераў і вадзіцеляў таксама павіншавалі грашовымі прэміямі і граматамі прадстаўнікі райвыканкама, абкама і райкама прафсаюза работнікаў аграпрамысловага комплексу, а на тэхніцы двухтысячнікаў з’явіліся спецыяльныя інфарматыўныя наклейкі. Акрамя таго, Юрый Манкевіч як малады кіроўца атрымаў заахвочванне ад абласнога камітэта ГА «БРСМ».