У Магілёве з’явіцца новая адметная мясціна, здольная прыцягнуць турыстаў. Гісторыкі задумалі аднавіць турму Магдэбургскага горада. І гэтая работа ўжо распачалася.

Магілёўскі Арбат – пешаходная вуліца Ленінская – аблюбаваная гараджанамі і турыстамі гістарычная частка горада. Старыя будынкі – помнікі мінулага – захаваліся тут да сёняшнягя дня. У адным з іх і будзе размяшчацца адноўленая турма.

Ідэя належыць Музею гісторыі Магілёва. «Там будзе камера са зняволеным, закаваным у калодкі, - паведаміў дырэктар установы культуры Аляксей Бацюкоў. - А побач - свабодныя калодкі для тых, хто захоча сфатаграфавацца. У турме размесціцца дыба, а таксама кат. Яго называлі ў часы Магдэбургскага права містэр».

Пра атмасферу, якая панавала ў турме часоў Магдэбурскага горада, будуць нагадваць старыя скляпеністыя столі. Яны найбольш падыходзяць па антуражы, кажуць гісторыкі. Пра жыццё зняволеных нагадае паўзмрок. Каб належным чынам выканаць задуманае, Музей гісторыі Магілёва далучыў да падрыхтоўчай працы спецыялістаў-дэкаратараў. Ад іх майстарскай рукі будзе залежаць, наколькі ўразіць турма сваіх наведвальнікаў. «Зараз мы ўжо дамовіліся з некаторымі мастакамі, каб яны дапамаглі выканаць гэты праект, - паведаміў Аляксей Бацюкоў. - Магілёўскаму скульптару і мастаку Андрэю Вараб’ёву даручана падумаць, як будуць выглядаць манекены. Іншыя спецыялісты ўжо азадачаны, як выканаць тэхнічныя работы».

Па матэрыяле Радыё «Магілёў»