4 кастрычніка стартаваў міжнародны паралімпійскі велапрабег Ліпецк - Страсбург — Парыж “Свет без бар’ераў і граніц”, і праз тры дні каля 20 яго ўдзельнікаў, сярод якіх, між іншым, былі сляпыя і з ампутаванымі канечнасцямі веласіпедысты, сустракалі хлебам-соллю прадстаўнікі аддзела культуры і пярвічкі “БРСМ” з Вяззеўскай школы. Цёплымі словамі прывітаў гасцей і начальнік аддзела фізічнай культуры, спорту і турызму Асіповіцкага райвыканкама Віктар Шыльцаў.

За два з паловай тыдні падарожнікі з Ліпецка, Краснаярска і Чачэнскай рэспублікі наведаюць больш за 40 гарадоў Расіі, Беларусі, Польшчы і Германіі. Фінішуюць яны 21 кастрычніка ў Парыжы на Елісейскіх палях.

Гэтае мерапрыемства праводзіцца для таго, каб паказаць велічнасць і нязломнасць чалавечага духу, а таксама з мэтай прыцягнення ўвагі грамадства да праблем людзей з абмежаванымі магчымасцямі, стварэння для іх безбар’ернага асяроддзя.

Удзельнікі велапрабегу прызналіся, што былі прыемна ўражаны якасцю беларускіх дарог і гасціннасцю гаспадароў. На памяць спартсмены атрымалі брашуры, якія раскажуць ім у агульных рысах пра наш цудоўны асіповіцкі край.

”Асіповіцкі край”