На Магілёўшчыне завяршаецца абласны тур ХI рэспубліканскага фестывалю народнай творчасці ветэранскіх калектываў “Не старэюць душой ветэраны”. Яго арганізатары – абласны метадычны цэнтр народнай творчасці і культурна-асветнай работы і абласны Савет прафсаюзаў.

У аглядзе-конкурсе ўдзельнічаюць аматарскія калектывы і індывідуальныя выканаўцы пенсійнага ўзросту клубных установаў вобласці, у тым ліку ветэраны Вялікай Айчыннай вайны, Узброеных сіл і працы. У лютым ладзіліся конкурсныя прагляды на базе ўстаноў культуры Крычаўскага і Бабруйскага раёнаў, а таксама Дома культуры тэкстыльшчыкаў ААТ “Магатэкс”. У гэтым месцы журы падвядзе канчатковыя вынікі абласнога тура фестывалю.

Ацаніць жа ўсё багацце творчасці ветэранаў у розных намінацыях няпроста, паведамілі карэспандэнту сайта спецыялісты ўпраўлення культуры аблвыканкама. Разнастайнасцю адрозніваюцца жанры і стылі, у якіх прэзентуюць сваю творчасць канкурсанты. На сцэне выступалі акадэмічныя хары і хары з народнай манерай выканання, вакальныя ансамблі, салісты і майстры мастацкага слова. Таксама свае таленты дэманстравалі майстры дэкаратыўна-прыкладной творчасці: былі арганізаваны адмысловыя выставы, дзе экспанаваліся вырабы з дрэва, саломкі, лазы, бісера, вышыўка, вязанне і многае іншае. Творчыя візіткі прапанавалі ветэранскія аматарскія аб’яднанні і клубы па інтарэсах.

Пераможцы будуць прадстаўляць вобласць на заключных мерапрыемствах ХI рэспубліканскага фестывалю народнай творчасці ветэранскіх калектываў, якія пройдуць у маі гэтага года ў Мінску.