Сёлета святкаванне Дня беларускага пісьменства адбылося ў Глыбоцкім раёне Віцебскай вобласці. Наступнае - юбілейнае - пройдзе 1 верасня 2013 года. Гонар быць яго сталіцай выпаў Быхаву.

Старшыня Быхаўскага райвыканкама Дзмітрый Калееў даў добрую адзнаку насычанай праграме свята на Глыбоччыне. Ён поўны імкнення дабіцца таго, каб у наступным годзе гасцям і ўдзельнікам Дня беларускага пісьменства таксама надоўга запомніўся прыгожы куток Прыдняпроўя.

Гораду ёсць што расказаць і паказаць. У раёне нядаўна адроджаны старажытны Свята-Увазнясенскі манастыр, заснаваны ў 1623 годзе. Тут захоўвалася ікона Божай Маці, якую падараваў у 1659-м князь Пажарскі.

Гісторыя Быхаўшчыны слаўная выдатным помнікам беларускай нацыянальнай культуры XVII стагоддзя - Баркулабаўскім летапісам, які захоўваецца ў Дзяржаўным гістарычным музеі ў Маскве, і многім іншым.

Багаты гэты куток і на таленавітых людзей, артыстаў, навукоўцаў, паэтаў, празаікаў. Ёсць пэўныя здабыткі сёння ў працаўнікоў сельскай гаспадаркі і прамысловасці. А гасцям тут заўсёды рады...

Па матэрыяле газеты "Магілёўскія ведамасці"